Ангилал: Онцлох мэдээ

122 жилийн түүхтэй Япон улсын №1 түргэн хоолны сүлжээ ресторан ЁОШИНОЯА брэнд 2022 оны 1-р сарын 13-нд Монгол улсад анхны салбараа амжилттай нээлээ.

Ёошинояа брэнд нь тэртээх 1899 онд Япон улс, Токио хотын Нихонбаши хэмээх хөл хөдөлгөөнтэй загасны зах дээр үүссэн бөгөөд “Энгийн, Амттай, Түргэн” гэсэн уриан доор 122 жилийн турш Япончуудын төдийгүй дэлхийн бусад орны хүмүүсийн хамгийн идэх дуртай түргэн хоолнуудын нэг болж чаджээ. Өдгөө Ёошинояа олон улсын франчайз түргэн хоолны сүлжээ ресторан нь Дэлхийн 12 оронд, 2100 гаруй салбартайгаар үйл ажиллагаа явуулж байна.

Ёошинояа брэндийн хамгийн алдартай хоол нь Gyudon буюу Үхрийн махтай боул юм. Энэ нь сайн чанарын цагаан будаа, том хэрчсэн сонгино, Австрали Ангус үйлдрийн үхрийн махыг 122 жилийн турш өнөөг хүртэл уламжлагдан ирж, таашаагдсан тусгай жорын шөлөнд чанаж бэлтгэсэн хоол юм.

– Танд энэ өдрийн мэнд хүргэе. “UB Group” компани сүүлийн үед тун завгүй ажиллаж байгаа гэж сонссон. Тэр дундаа “Block.mn”-тэй хамтарч, үл хөдлөх хөрөнгийн төслүүд дээрээ олон нийтээс хөрөнгө оруулалт төвлөрүүлэхээр ажиллаж байгаа юм байна. Энэ ажлынхаа талаар ярилцлагаа эхлүүлье.

– Сайн байна уу. Нийт уншигчдадаа энэ өдрийн мэнд хүргэе. Манай “UB Group” компани “Block.mn”-тэй хамтарч уламжлалт хөрөнгө оруулалтын схемийг технологиор дэмжүүлэн, xүртээмжтэй хөрөнгө оруулалт хийх нөхцөлийг бүрдүүлж байна. Тодруулбал “UB Group”-ийн хэрэгжүүлж байгаа хоёр төслийн нийт санхүүжилтийн 30% дээр “Block.mn”-ээр дамжуулж хөрөнгө оруулалт татах юм. Ингэснээр тухайн хоёр төслийн 30%-аас “UB Group” компани хэдий хэр хэмжээний ашиг олно, түүнийг нь хөрөнгө оруулсан олон нийт өгөөж хэлбэрээр эргүүлэн авах боломж бүрдэнэ. Бид банкнаас зээл авбал 15-18%-ийн хүүтэй байдаг. Харин олон нийтээс хөрөнгө оруулалт төвлөрүүлснээр тэрхүү зээлийн хүүд төлөх мөнгө хөрөнгө оруулагчдад маань өгөөж байдлаар очно гэсэн үг. Мөн тухайн үл хөдлөх хөрөнгийг хямд байгаа дээр нь буюу төсөл эхэлж байхад нь хөрөнгө оруулж байгаа учраас үнийн өсөлтөөс ч өгөөж хүртэх боломжтой. Үүнээс гадна тухайн хүний хөрөнгө оруулсан үнийн дүнгээс хамаарч, “UB Group”-ийн бусад төслүүд дээр 8-10%-ийн хөнгөлөлт эдлэх боломжийг олгож байна. Нэг ёсондоо шууд өгөөж нь жилийн 15-18% гэж байгаа ч шууд бус өгөөжөө оруулаад тооцвол дунджаар 25-30 гаруй хувийн өгөөжийг хүртэж байгаа юм.

– Өмнө нь уламжлалт хэлбэрээр хөрөнгө оруулалтаа татахад ямар бэрхшээл үүсдэг байсан бэ. Яагаад “Block.mn”-тэй хамтарч технологиор дэмжүүлэн олон нийтээс хөрөнгө оруулалт татахаар шийдэв?

– “Block.mn” бол манай хөрөнгө оруулалтаа олон нийтээс татах www.invest.ubgroup.mn платформын теxнологи болон маркетингийг хийж байгаа компани юм. Өмнө нь уламжлалт хэлбэрээр гэвэл тухайн хүн өөрийн биеэр Хөрөнгө оруулалтын сан дээр очиж гарын үсэг зураад, дансаа цэнэглээд, төслүүдэд хөрөнгө оруулалт хийдэг байсан. Харин “Block.mn” үүнийг илүү амарчилж, цахим хэлбэрт шилжүүлж байгаа хэрэг. Ингэснээр та дэлxийн аль ч оронд байгаагаас үл хамаарч, өөрийн биеэр ирэх шаардлагагүйгээр хөрөнгө оруулалтаа хийх боломжтой болж байна.

– Цаашид ингэж технологиор дэмжүүлж олон нийтээс хөрөнгө оруулалт бүрдүүлэх нь үл хөдлөх хөрөнгийн салбарт болон нийгэмд ямар үр ашигтай гэж харж байна?

– Манай энэ удаагийн төсөл илүү хүртээмжтэй хөрөнгө оруулалтыг бий болгох зорилготой. Өмнө нь үл хөдлөх хөрөнгөд заавал их хэмжээний мөнгөөр хөрөнгө оруулдаг байсан бол манай төсөлд 100 мянган төгрөгөөс дээш хүссэн дүнгээр хэн ч хөрөнгө оруулах боломжтой. Мөн үл хөдлөх хөрөнгийн бизнес эрхлэхээр бол заавал газар худалдаж аваад, байшингаа бариад, ашгаа хийдэг байсан бол одоо тэгэх шаардлагагүй. Бүрэн судалгаатай, бүx зүйл нь шийдэгдсэн төслүүд дээр хөрөнгө оруулснаар өөрийн үнэ цэнтэй цаг хугацаагаа хэмнэхээс гадна төслийг хэрэгжүүлэгчидтэй адил хэмжээний ашиг олоx боломж бүрдэж байна. Энэ бүхэн үл хөдлөх хөрөнгийн салбарт дэвшлүүдийг авчрахаас гадна олон залууст боломжийг олгох юм.

– Ямар хоёр төсөл дээр олон нийтээс хөрөнгө оруулалт татах вэ? Энэxүү хоёр төслөө танилцуулаач.

– Эхнийx нь Яармагт баригдаж байгаа “Central Park” гэж төсөл байна. Тус төсөл нь нийт 12 блокоос бүрдэх томоохон төсөл байгаа юм. Энэ 12 блокийн зөвхөн 2 блок дээр нь л хөрөнгө оруулалтаа татна. Тухайн 2 блокийн нийт хөрөнгө оруулалт нь 40 орчим тэрбум гэж тооцож байгаа. Үүний 30% дээр л олон нийтээс хөрөнгө оруулалт татах төлөвлөгөөтэй. Дараагийнх нь Хан-Уул дүүрэгт баригдах “Vision” гэх оффис төсөл. Тухайн төслийн нийт хөрөнгө оруулалтын 10 гаруй хувь дээр хөрөнгө оруулалт татах төлөвлөгөөтэй ажиллаж байна. Хоёр төслийн маань илүү дэлгэрэнгүй мэдээллийг www.invest.ubgroup.mn веб сайтаас хүлээн авах боломжтой.

– Хөрөнгө оруулалтаа олон нийтээс хэдий хэр хугацаанд татан төвлөрүүлэх вэ?

– Бид 10 дугаар сарын 29-нд “Block.mn”-тэй хамтран гаргаж байгаа www.invest.ubgroup.mn платформоо албан ёсоор нээнэ. Энэ өдрөөс хойш хагас сарын хугацаанд хөрөнгө оруулалтаа олон нийтээс татна. Ингэхдээ xөрөнгө оруулагчид маань оруулсан мөнгөө сонгосон хугацаанаасаа хамаараад түгжинэ гэдгийг ойлгох хэрэгтэй. Хугацаанаасаа өмнө эргүүлэн татаж, хэрэглэх боломжгүй.

– Цаг гарган ярилцсанд баярлалаа. Удахгүй болоx платформын нээлтийн ажилд нь амжилт хүсье.

– Танай хамт олонд ч мөн баярлалаа.

Эх сурвалж: https://www.presscenter.mn/uulzvar/blockmn-ub-group

Тээвэр, барилга, үйлдвэрлэл, үйлчилгээ зэрэг бизнесийн найман салбарт 20 гаруй охин компанитайгаар үйл ажиллагаа явуулдаг “Улаанбаатар групп” ХХК-ийн ТУЗ-ийн дарга, үүсгэн байгуулагч Ц.Батбаатар бол бидний өнөөдрийн зочин.

Арван жилийн дунд сургуулиа төгсөх жилээ анхны компаниа байгуулсан тэрээр өдгөө Монголын бизнесийн салбарт 16 жилийн турш ажиллаж, тээвэр, барилга, санхүү, худалдаа, үйлчилгээ, үйлдвэрлэл, хөрөнгийн менежмент ба нөхөн сэргээлт зэрэг олон чиглэлд хөрөнгө оруулсан эрхэм юм. Тээврийн салбарт л гэхэд Монголдоо хамгийн анхны газрын тосны олон улсын тээврийг эхлүүлж, өдгөө 1.5 сая км зайд тээвэрлэлт хийж гүйцэтгэжээ.

Байршил: Сүхбаатар дүүрэг, Аюуд Тауэр
Эрхэлдэг ажил: “Улаанбаатар Групп” ХХК ТУЗ-ийн дарга
Хэрэглэдэг гар утас: iPhone 13 Pro
Хэрэглэдэг компьютер:
Сошиал хуудсууд: Bagi Tse (Инстаграм)

1. ТАНЫ КАРЬЕРААС БИД ЮУ, ЮУГ МЭДЭХ ЁСТОЙ ВЭ?
Зах зээлийн нийгмийн ороо бусгаа цаг үед аав ээж хоёр маань бусадтай адил ганзагын наймаа хийж эхэлсэн. Гэр бүлийнхээ бизнест туслахын төлөө би харьцангуй эрт буюу гуравдугаар ангиасаа мөнгөтэй харьцсан түүхтэй хүн. Эрээнээс бараанаас зөөх буюу наймаачдын хэллэгээр “гахай дарах” бол миний анхны толгой мэдэж хийсэн бизнес. Тухайн үед 16 насанд хүрсэн хүүхэд гадаад паспорт авах боломжтой байв. Насанд хүрээгүй миний хувьд Нарантуул захын наймаачдыг дагаж, шар хуудсаар тун ч олон удаа Эрээн-Улаанбаатарын хооронд зорчсон доо. Авчирсан бараагаа ихэвчлэн хөдөө орон нутагт борлуулна. Зах зээлээ тун сайн мэдэрдэг байсны хувиар ашгийн хувьд ч өндөр.

Хүүхэд гэж өөрийгөө гололгүй тууштай зүтгэсний үр дүнд хэдхэн жилийн дотор багагүй хэмжээний хуримтлалтай болж, улмаар 2006 онд “Улаанбаатар Групп”-ийн суурийг тавьж байлаа. Арван жилийн сургуулиа дөнгөж төгсөөд байсан байгуулсан анхны компани орчуулгын товчоо байсан юм. Тухайн үед мөн Монголд ховорхон байсан машин түрээсийн үйлчилгээг нээсэн. Хятадаар чөлөөтэй ярьдаг, дээр нь нэмээд хятад бизнес эрхлэгчидтэй ойрхон ажилладаг байсан маань энэ чиглэлд үйл ажиллагаа эрхлэхэд дөхөм байсан болов уу.

Хуулийн дагуу Монгол Улсад үйл ажиллагаа явуулж буй хятадын төрийн өмчит компаниуд үл хөдлөх, хөдлөх гээд ямар ч төрлийн хөрөнгө эзэмших боломжгүй байдаг. Тиймээс тэд манай улсад үйл ажиллагаа эрхлэхийн тулд үл хөдлөх, оффисын барилга, машин түрээслэхээс өөр гарцгүй. Эдгээр хүмүүсийн нэн тэргүүний хэрэгцээг бусдаас түрүүлж олж харсан тул машин түрээсийн үйлчилгээг зоригтойгоор эхлүүлсэн хэрэг.

Ингээд 2006 оноос хойш тасралтгүй 16 жилийн хугацаанд бизнес эрхлэхийн сацуу академик мэдлэгээ ч хойш тавилгүй Хятад хэлний багш орчуулагч болон СЭЗДС-д бизнесийн удирдлагын чиглэлээр суралцсан.

2. ТАНЫ АЖЛЫН ДУНДАЖ НЭГ ӨДӨР ХЭРХЭН ӨНГӨРДӨГ ВЭ?
Долоо хоногтоо гурван удаа өглөө бүр найман цагаас хурал товлож, тухайн долоо хоногийнхоо ажлыг ерөнхийд нь тоймлоод харчихдаг. Бусад үеэр бол чөлөөтэй ажиллахыг эрмэлздэг талтай. Өөрийгөө ажайл арга барилаар буюу богино хугацаанд өндөр бүтээмжтэй ажиллахыг хичээдэг хэмээн зөвтгөж болох ч нөгөө талдаа цагийн менежмент муутай нэгэн гэдгээ үгүйсгэхгүй ээ. Жишээлбэл, надад хувийн туслах гэж байхгүй, зарим ажлуудыг эртнээс төлөвлөхгүйгээр өмнөх өдөр нь шийдээд л маргааш нь гүйцэтгэх тохиолдол олонтоо.

Фитнес хийх, гэр цэвэрлэх, мод чулуу янзлах гээд ахуйн ажлын цаг бол миний оргил төвлөрдөг үе. Бизнесийн шинэлэг санаа бодож олох, хэлэлцээр дээр тавих саналаа бэлдэх гээд чухал асуудлуудад гаргалгаа олохыг хүссэн үедээ биеийн хүчний ажил хийх дуртай.

3. ТАНЫ АЖЛЫН НӨҮ-ХАУ?
Хүмүүс бизнесийн нууц, миний амжилтад хүрсэн түүх гээд л ярьдаг. Харин надад тийм нууц байхгүй. Ер нь энэ олон жилийн алдаж оносон туршлагаасаа эргээд харахад супер санаа гэж хаана ч үгүй. Дэлхий дээр хэдэн тэрбум гоё санаа тэнүүчилж яваа. Гагцхүү тэр санааг хэрэгжүүлж, бусдын асуудлыг шийдэж чадсан нь л ялагч юм.

Би ажил хэрэг болон хувийн амьдрал аль алинд нь ил тод байхыг хүсдэг. Түүнчлэн ямар ч бизнесийг ганцаараа бус бусадтай хамтарч хийх сонирхолтой. Бизнесийн хамтрал гэдэг зөвхөн хөрөнгө оруулалтаа хоёр хуваахаас гадна эрсдэлээ хамт үүрэх, хамтдаа өсөн дэвших, давуу талуудаа нийлүүлэхийн нэр.

4. АШИГЛАХГҮЙ БАЙЖ ЧАДДАГГҮЙ АПП, ХЭРЭГСЛҮҮД ЮУ ВЭ?
Дээхэн үед бол тооны машин, тэмдэглэлийн дэвтэр хоёр байхад л хангалттай байлаа. Харин одоо бол гар утас хоёрыг орлож байна.

Өдөр тутамдаа гэвэл харилцаа холбооны зорилгоор Wechat, Instagram, Facebook Messenger, Viber гэхчлэн аппыг өргөн хэрэглэнэ. Түүнчлэн машинд хорхойтой ч ажлын цагаар жолооны ард суухын оронд Ubcab дуудах нь илүү хялбар санагддаг болсон шүү.

 

5. ЦАГ ХЭМНЭХ ХАМГИЙН САЙН АРГА ТАНЬ ЮУ ВЭ?
Миний хувьд уулзалтад хоцорно, заримдаа ор тас мартана гээд тун хэнэггүй талдаа нөхөр. Заримдаа хүмүүс надаас ийм чөлөөтэй ажилладаг хэр нь яаж энэ олон бизнесийг зохицуулж, асуудлыг нь шийдэж чаддаг юм бэ гэж асуудаг. Дээр хэлсэнчлэн надад сүртэй нууц, цаг хэмнэх арга гэж байхгүй дээ. Олон төрлийн журам, бичиг цааснаас илүү би хөгжилтэй ажиллах дуртай. Ажил гэдэг чинь тэр чигтээ тоглоом. Хүн ер нь яах гэж амьдардаг юм бэ? Амьдрахын тулд ажил хийж буй болохоос ажиллахын тулд амьдраад байвал гунигтай явдал, тийм үү. Би залуустаа “Ажлыг ял шиг хүлээж авч болохгүй шүү. Хийж буй зүйлдээ чин сэтгэлээ зориулж чадвал ажил яг л эвлүүлдэг тоглоомтой адил хялбархан санагдах болно оо” гэж хэлдэг.

6. ХИЙХ АЖЛАА ХЭРХЭН ТӨЛӨВЛӨДӨГ ВЭ?
Манай групп дотооддоо Microsoft Teams ашигладаг тул өдөр тутмынхаа ажлыг Microsoft To Do апп дээр тэмдэглэж хэвшсэн. Байгууллагын хувьд стратеги, төлөвлөлтөө таван жилээр гаргадаг. Монголд бол таван жил гэдэг харьцангуй урт хугацааны төлөвлөгөө гэхэд болно. Учир нь, манай зах зээл тун тогтворгүй. Одоо хямарч байгаад хагас жилийн дараа супер эдийн засагтай ч болж магад. Юу тохиолдохыг хэн ч таашгүй.

7. ЭРЧ ХҮЧЭЭ ХЭРХЭН СЭЛБЭДЭГ ВЭ?
Фитнесээр хичээллээд 10 гаруй жил өнгөрч байна. Дасгал хөдөлгөөн бол миний эрч хүчээ сэлбэх гол хэрэгсэл. Зааланд хөлсөө гаргах үед бүх зүйлс яг л байх ёстой байрандаа очсон мэт таатай мэдрэмж төрдөг. Мөн амьдралд ямар нэгэн асуудал тулгарч, түүний ард давж гарах үед ядрах бус харин ч сэргэг болдог талтай шүү.

8. ҮНДСЭН АЖЛЫНХАА ХАЖУУГААР ДУРЛАЖ ХИЙДЭГ ТӨСӨЛ/АЖИЛ ЮУ ВЭ?
“Supercar” төрлийн машинд хорхойтой. Миний хүсдэг зүйлсийн нэг нь Улаанбаатар хотын замаар хэнээс ч ичих санаа зовох зүйлгүйгээр “supercar” унах залуус олшроосой. Хөлсөө дуслуулж цуглуулсан хөдөлмөрийнхөө үр шимээр хүссэн төмөр хүлгээ өөрийн болгоод, салхи татуулан давхих чинь амьдралаас мэдэрч болох сайхан кайфуудын нэг. Гэвч өнөөгийн Монголд тэрбум төгрөгийн машин уначхаад битүү хар теньтэй, өөрийгөө хэн гэдгээ мэдэгдүүлэхийг хүсдэггүй хүмүүс олон байгаа нь харамсалтай.

Машинаас гадна төрөл бүрийн адранелин ялгаруулсан спортоор хичээллэх хүсэлтэй. Гольфт сонирхолтой хэдий ч маш их цаг зав шаардсан спорт тул тогтмол хичээллэж амжихгүй л байна.

9. ХИЙЖ БУЙ АЖЛЫН ОНЦЛОГ ЮУ ВЭ? ЭЕРЭГ САЙН БА ХЭЦҮҮ БЭРХШЭЭЛТЭЙ ТАЛУУД?
Би нэг түүх ярьж өгье. Дөнгөж арван жилээ төгссөний дараа, нэгдүгээр курст сурч байх үедээ би 90 мянган доллароор гурван машин худалдан авсан юм. Өөрийнхөө халааснаас 20 хувийг төлж, үлдсэнийг нь машины ченжүүдээс зээлтэл нөгөө гурван машины хоёр нь онхолдчихсон. Улмаар машин зарсан хүмүүст дарамтлуулж, сүрдүүлэгт өртөж, сэтгэлээр унаж байлаа. Гэхдээ одоо эргээд бодоход 20 нас ч хүрээгүй цэл залуухан байхдаа би ямар гоё эрэмгий, зоригтой байсан юм бэ гээд өөрөөрөө бахархдаг шүү. Амьдралын хамгийн хэцүү үе маань ингэж надад урам зориг өгдөг дурсамж болон хувирсан юм.

Үүнтэй адил бид одоо эдийн засгийн хувьд тун амаргүй цаг үеийг туулж байна. Гэхдээ манай улс бизнес эрхлэхэд маш олон боломж, давуу талтай. Бидэнд шийдээгүй олон асуудал байгаа нь нөгөө талдаа асуудал бүрд гарц олох бизнес босгох боломжтойг харуулж буй явдал. Хэрэв би Хятад эсвэл Солонгост бизнес эрхэлье гэвэл надад ямар ч орон зай үлдээгүй шүү дээ.

Зөвхөн барилгын салбарт гэхэд бид түүхий эдийнхээ 50-60 хувийг гаднаас импортолж байна. Тэгэхээр барилгын материалын үйлдвэрлэлээ хөгжүүлэх асар том зах зээл байна гэсэн үг. Мэдээж тусгай зөвшөөрөл, хүнд суртал, авлига, хөрөнгө оруулалтын орчин зэрэг олон асуудал байгааг үгүйсгэх аргагүй. Гэхдээ энэ бүхэн бидний туулаад ард нь гарах л ёстой асуудал. Бусдаар бизнес хийх явцад алдагдал, уналт гээд хэцүү цаг үе тохиох нь угаас ойлгомжтой. Тэр бүх үед шантарвал хэрхэн урагшилж чадах билээ.

10. ТА ОДОО ЮУН ДЭЭР ТӨВЛӨРЧ БАЙГАА ВЭ? ОЙРЫН ТӨЛӨВЛӨГӨӨ?
Манай хамт олон 2030 он гэхэд Улаанбаатар хотыг утаагүй болгох маш том амбицтайгаар 20 мянган айлын айлын экологид ээлтэй ногоон орон сууцны төсөл эхлүүлээд байна. Цар тахлаас хойш эдийн засаг, геополитик зэрэг олон шалтгааны улмаас бараа материалын нөөц шавхагдаж, олдсон нь хэтэрхий үнэтэй байгааг хүн бүхэн л харж байгаа биз ээ. Дээрээс нь эцсийн худалдан авагчийн худалдан авах чадвар нэмэгдэхгүй байгаа энэ амаргүй цаг үед аль болох иргэдэд хүртээмжтэй төслүүд хэрэгжүүлэхийг хичээж байна.

“Улаанбаатар Групп”-ын үндсэн бизнесүүдийн нэг бол тээвэр зуучийн салбар. Бид Монголдоо анх удаа Хятадын газар нутгийн гүн хүртэл монгол жолооч, монгол дугаартай машинаар тээвэр хийсэн компани. Цар тахлын дараагаас бид энэ салбарт онцгойлон анхаарал хандуулж, тээврийн салбарт Ази-Европыг холбосон үндэсний компани болно гэх алсын хараатайгаар ажиллаж байгаагаа дурдах нь зүйтэй.

11. ТА ӨӨРИЙГӨӨ ХЭРХЭН ХӨГЖҮҮЛЖ, СУРАЛЦДАГ ВЭ?
Сүүлийн үед IELTS 7 оноо авах зорилгоор англи хэлээ давтаж байна. Бусдаар бол онолын номоос мэдлэг авахаас илүүтэй өдөр тутмын бизнесийн өрсөлдөөнөөс л хүссэн хүсээгүй суралцаад явдаг даа.

12. САНАЛ БОЛГОХ НОМ, ХӨГЖИМ, КИНО?
Тархиа амраах зорилгоор хөнгөхөн, адал явдалтай, тулаант кинонуудыг шимтэн үзэх дуртай юм байна.

13. АВЧ БАЙСАН ХАМГИЙН САЙН ЗӨВЛӨГӨӨ?
Бусдын өгсөн зөвлөгөөг бодит амьдрал дээр хэрэгжүүлдэг хүн цөөхөн. Өөрийн зөв гэж харж буй итгэл үнэмшилдээ үнэнч байж, тууштай хөдөлмөрлөх нь илүү чухал гэж хувьдаа боддог.

14. БУСДАД ШИДЭХ САНАА?
Бизнес хийнэ гэдэг бусдад харагдаж байгаа шигээ тийм ч жаргалтай ажил биш. Маш олон хүмүүсийн өмнө хариуцлага хүлээхийн сацуу хувийн амьдралдаа олон золиос гаргах шаардлагатай. Амьдрал гэдэг хэзээ ч инстаграмын зурагтай адил байдаггүй гэдгийг залуус маань ойлгоосой. Үнэ цэнээ хэзээ ч худалдаггүй шударга бөгөөд тууштай байвал болох нь тэр.

Эх сурвалж: UNREAD https://unread.today/c/howiwork-batbaatar?fbclid=IwAR2Nc0I3Vceus7akKSy2G3VKoRe7UpS0m3T4snW2V6AxIBidJhEKV91_zvU

Монгол улсад барилгын салбар эрчтэй хөгжиж байна. Тэр дундаа Улаанбаатар хот сүүлийн жилүүдэд олон сайхан барилгуудтай болж. Үзэмж, загвар, технологи ч дагаад хөгжсөн. Харин тэр барилга дотор ОРШИН СУУДАГ ТАНД ЗОРИУЛСАН ҮЙЛЧИЛГЭЭ ХЭРХЭН ХӨГЖСӨН БОЛ.
Энэ талаар ярилцахаар бид энэ удаагийн зочноороо ITC-International trade center төслийн удирдагч, Аясгал цэн ХХК-ийн захирал А.Уянгатай ярилцсан сонирхолтой ярилцлагыг хүргэж байна.

– Танд энэ өдрийн мэнд хүргэе. Юуны өмнө өөрсдийнхөө тухай танилцуулж яриагаа эхлэх үү.

Баярлалаа. Танд болон уншигчдадаа энэ өдрийн мэндийг хүргэе. Манай компани хөрөнгийн менежментийн үйлчилгээ буюу таны үл хөдлөх хөрөнгийн өнгө үзэмж, үнэ цэн, ая тухтай амьдрах орчин, аюулгүй байдлын төлөө зүтгэдэг гэсэн үг. Мөн миний хувьд одоогоор компанийнхаа хажуугаар оффисын төслийн удирдагчаар ажиллаж байна. Энэхүү хоёр ажлаасаа дүгнээд харахад өнөө цагт компаниуд зөвхөн оффисын талбай худалдан авахаа больжээ. Харин оффисын хэрэглэгч рүү чиглэсэн үйлчилгээнүүд, үйлчилгээний чанарыг чухалчлан сонголтоо хийдэг болсон. Яг энэ хэв шинж орон сууцны зах зээл дээр илүү олон жилийн өмнөөс ажиглагдаж эхэлсэн. Орон сууц худалдан авагчид хөршөө, үйлчилгээгээ, ногоон байгууламжаа худалдан авдаг болсон буюу хөрөнгийн менежментийн компанийн хэрэгцээ шаардлага өдрөөс өдөрт өсөж нэг үгээр манай бизнес хөгжлийн эхний шатандаа явж байна гэж болох юм. Их ирээдүйтэй сонирхолтой салбарт ажилладаг гэсэн үг.

– Тэгэхээр танай компани барилгын салбарт хамаарах уу эсвэл үйлчилгээний салбарт хамаарах уу?

Энэ хоёр салбарыг салгаж ойлгох боломжгүй цаг үед амьдарч байна. Цаашид ч тийм байх болно. Харин ч илүү нягт уялдаж ажилласнаар хоорондын ялгамжтай байдал багасна. Өмнө хэлснээ тодруулбал хэдхэн жилийн өмнө хүмүүс үл хөдлөх хөрөнгө сонгохдоо зөвхөн барилга байгууламж талаас нь анхаарч сонголтоо хийдэг байсан.

Харин одоо бол тухайн үл хөдлөх хөрөнгө нь миний амьдрахуйд хэрхэн нөлөөлөх, нийцэх талаар заавал судалдаг болж. Би энд аюулгүй, тав тухтай, сэтгэл амар, дээрээс нь жижиг нервүүдгүй байж чадах уу гэдэг нь хамгийн гол үзүүлэлт болдог болж. Энэ бол маш сайн хандлага. Тэгэхээр хөрөнгийн менежментийн үйлчилгээний чанар стандарт, хүртээмж нь хэрэглэгчээсээ нэг алхмын өмнө байж тэдний өмнөөс асуудлыг олж хардаг, шийдэж чаддаг байх ёстой. Энэ л манай хамт олны үндсэн зорилго.

– Ойлголоо, тэгвэл хөрөнгийн менежмент гэж юу вэ? гэдгийг эхлээд тодруулъя. Монгол улсын хувьд хэрхэн хөгжсөн байдаг бол?

Үл хөдлөх хөрөнгийн менежмент гэдэг бол оффис, орон сууц, үйлдвэрийн барилга ер нь үл хөдлөх хөрөнгө гэж нэрлэгдэх бүхий л зүйлийн насжилтыг уртасгах, анх ямар байсан яг л тэр чигт нь удаан хугацаанд хадгалах үйлчилгээ гэж товчилж хэлье.

Оффисын жишээн дээр тайлбарлая. Социализмын үеэс эхлээд одоогоос бараг 20 жилийн өмнө бид ажлаа хийдэг газрыг контор, оффис гэж нэрлэж ирсэн. Харин ажлаас бусад цагт амардаг газрыг гэр гэж нэрлэдэг. Контор нь ажиллах л зориулалттай тул ажил хийх анхан шатны хэрэгцээг бүрдүүлж байсан. Бүх хүн ийм л байх ёстой мэт л ойлгодог. Иймд конторын талаарх сэтгэл ханамж гэдэг ойлголт бараг үгүй. Үүнийг шаардах ёстойгоо ч мэддэггүй байсан. Хөрөнгийн менежмент гэдэг бол энэ ойлголтыг өөрчилж хүн бүр ажил дээрээ гэртээ байгаа мэт сэтгэл хангалуун байх нөхцөлийг бүрдүүлдэг бие даасан цогц систем юм. Гэх мэт байдлаар хөрөнгийн менежментийн үйлчилгээ Монголд маш сайн хөгжиж эхэлж байна. Үл хөдлөх хөрөнгийн эзэд, оффис, орон сууцны оршин суугч хүн бүр хөрөнгийн менежментийг зүй ёсны хэрэгцээ хэмээн хүлээн зөвшөөрч нэн таатай ханддаг. Хойшид ч улам хөгжинө.

– Хөрөнгийн менежментийн хөгжилд сайн эсвэл муугаар нөлөөлж байгаа хүчин зүйлс нь юу вэ?

Мэдээж амар зүйл гэж юу байх вэ. Хамгийн хүндрэлтэй зүйл нь хөрөнгийн менежментийг цогцоор нь бүрэн утгаар нь хэрэгжүүлэхэд өнөөгийн барилга байгууламжийн хоцрогдсон шийдлүүд л байна даа. Дотор нь амьдрах хүнд бүрэн зориулаагүй мэт л байшин барьдаг нь хамгийн хэцүү. Тухайн оффисын барилга нь ажлаа хийж байгаа хүн бүр эрүүл, аюулгүй, эрсдэлгүй, ая тухтай орчныг бүрдүүлж чадаж байвал бүтээмж нэмэгдэх нь зайлшгүй. Гэвч барилгын дутуу шийдлээс болоод энэ бүхнийг бүрэн хэрэгжүүлэх боломж алдагддаг.

Иймд барилгыг анхнаас нь зөв төлөвлөж хэрэглэгчдийн эрэлт хэрэгцээнд нийцүүлж бүтээн байгуулах шаардлагатай. Өөрөөр хэлбэл барилгын архитектур шийдэл, интерьер дизайн энгийн нүдээр харахад сайхан байхаас гадна оршин суугчид, тэдний зочдын хэрэгцээг хангахуйц зөв төлөвлөлт, тав тухтай байх ёстой. Энэ л бидний хувьд тухайн үйлчилгээг хөгжүүлэхэд хамгийн хүндрэлтэй байдаг. Гэхдээ л манай улс дэлхийн бусад улсуудын адилаар бага багаар хөгжсөөр л байгаа шүү дээ. Сайн тал нь бол нийгэм тэр чигтээ манай үйлчилгээгээр өлссөн байгааг мэдэрдэг, аль чадахаараа хүрч ажиллахыг хичээж тун завгүй байгаадаа талархдаг (инээв).

– Тэгэхээр барилгыг анхнаас нь маш сайн бодож төлөвлөх ёстой болж байна. Харин барилгачид маань үүнийг хэрхэн үнэлдэг юм бол. Мэдээж хөрөнгө мөнгөний асуудал гарах л байх даа.

Хөрөнгө мөнгө мэдээж чухал. Гэвч хэн нэг нь түрүүлж хийх л болно. Одоо байгаа оффисууд дотор үйл ажиллагаа явуулдаг компаниудын ажлын байрны сэтгэл ханамж бүрэн дүүрэн байж чадахгүй л байна. Бид энэ хэмжээг нэмэгдүүлэх зорилгоор бас хөрөнгийн менежментийг бүрэн утгаар нь Монголд хэрэгжүүлэх боломжийг бүрдүүлэхээр зорьж ажиллаж байна. Үүний нэг тод жишээ бол Улаанбаатар хотынхоо төвд анхнаасаа барилга, үйлчилгээ хоёроо зөв нийцүүлж төлөвлөх ямар давуу талтай байж болдгийг харуулахаар нэгэн шинэ оффисын төсөл дээр ажиллаж байна.

– Тийм үү. Тэр нь хаана байдаг ямар оффис вэ?

Сүхбаатарын талбайн урд, Shangri-La явах замд байршиж байна. Төслийн удирдагчийн хувьд хэлэхэд үнэхээр сайхан оффис болно гэдэгт итгэлтэй байна. Манай оффист дотор нь ажиллаж байгаа, зочилж байгаа хэнийг ч хамгийн таатай ажиллах боломжийг өгдөг амьд организм болж хувирч байна.

Гэрэлтүүлэг, агааржуулалт, орон зай гэх мэт эрүүл аюулгүй тав тухтай байх бүхий л нөхцөлийг сайтар анхаарсан. Үүнээс гадна тэдний амьдрах хэрэгцээ бүрийг тооцож шийдэж байна. Ажлын байрны үйл ажиллагааны уламжлалт харилцаанууд сүүлийн үед ихээхэн өөрчлөгдөж байна. Заавал оффистоо ирэхгүйгээр цахимаар маш их ажил гүйцэтгэдэг болсон. Энэ бүх өөрчлөлтийг хүртэл анхаарах шаардлага гарч байна. Компаниудын үйл ажиллагаа хамгийн ухаалаг, хэмнэлттэй, уян хатан байх тэр шийдлүүдийг бий болгож байна. Тэднийг хамгийн бага зардлаар хамгийн их бүтээмжтэй байх боломж юу байна вэ гэдэг л манай багийн уриа болж байна.

Компани бүр хурлын өрөө, уулзалтын өрөө гэх мэт том том талбайд байнга зардал гаргах нь зөв үү? гэх мэт аль болох л тэдний өмнөөс зардлыг бууруулахыг хичээж байна. Компаниудын хэрэгцээг нарийвчлан судалж хамгийн зохист хэмжээг тодорхойлж чадвал харилцан ашигтай байж сэтгэл ханамж дээшилнэ. Нэг үгээр хотын төвд хүнд төвлөрсөн, хэнд ч хүртээмж сайтай, ухаалаг амьд оффис бий болно гэсэн үг. Танд таалагдаж байна уу? Энэ бол “Хүртээмжтэй” буюу “Inclusive” консепттой ITC | International trade center буюу Олон улсын бизнес, худалдааны төв.

– Үнэхээр сонирхолтой юм. Байшинг бараг л хүн юм шиг ярьж байгаа хүнтэй анх удаа таарлаа. Тэгэхээр хүн төвтэй гэж юу гэж байгаа юм бэ.

Та мэдэж байгаа байх. Сүүлийн үед нийтэд хүртээмжтэй барилга гэж ярьдаг болсон. Энэ төрлийн ойлголт, стандарт нь бол Монголд хөгжиж эхэлж байна. Маш товчоор хэлбэл тус байшин бүх хүнд хүртээмжтэй, нийцтэй байна гэсэн үг.
Өндөр настай, хүүхэд, хөгжлийн бэрхшээлтэй, харааны бэрхшээлтэй, бага насны хүүхэд гэх мэт хэн ч байсан ямар ч хүндрэлгүйгээр тус байшинг ашиглах боломжоор хангаж өгөх нь манай төслийн консепт буюу бидний гол зорилго.Барилга руу алхаж ороход хялбархан намхан налуу шат, хүний оролцоогүй онгойж, хаагддаг мэдрэгчтэй автомат хаалга, үүдэн хэсэгт тусгай хэрэгцээт иргэдэд зориулсан өргөгч лифт, хэнд ч хүртээмжтэй ариун цэврийн өрөө, хүүхэд хуурайлах, хөхүүлэх өрөө болон богино хугацаанд хүүхэд саатуулах өрөө зэрэг маш олон зүйлийг багтаасан. Хэн ч анзаардаггүй боловч хүнд саад болдог олон зүйл байдаг. Жишээ нь хаалга. Хүнд, хатуу онгойдог бол хөгшин хүн, хүүхэд, хөгжлийн бэрхшээлтэй иргэдэд их хэцүү. Шатны алхам хүртэл ямар их төвөг учруулдаг гээч. Энэ бүхнийг л бага ч гэсэн орхигдуулахгүйгээр бодож шийдэж байгаа болохоор л амьд байшин гэсэн юм шүү дээ. Нийтэд хүртээмжтэй барилга гэдэг нь өөрөө стандарт юм. Энэ олон улсын стандартыг ягштал мөрдөж бусдыг бодсон хандлагад тулгуурлана даа.

– Би анх тантай барилга ярина гэж бодож байсан. Харин та барилга ярьсангүй. Хүн л ярилаа.

Аливаа зүйлийг хийхдээ хүнийг л бодож байгаа бол зөв зам дээрээ байна гэсэн үг. Энэ бол хөгжил. Зөв ирээдүй. Ингэхээс өөр гарцгүй. Нэгэнт та ийм зүйл асууж буй тул нэг зүйл нэмээд хэлмээр байна. Одоо бид бүр цаашлаад манай оффист байдаг компаниудын харилцдаг зочдод хүртэл үйл ажиллагаагаа чиглүүлж байгаа. Компаниуд хүндэт зочин урьдаг. Энэ үед шаардлага гарвал зочинд таатай байх бүх төрлийн дэмжлэгийг үзүүлнэ. Гэнэтийн тооцоолоогүй хүндрэл гарч хүн хүчний шаардлага үүсэхэд манай баг ард нь бэлэн л байж байна. Зочны өмнө эвгүй байдалд орох эрсдэлийг хаана. Энэ тал дээр компаниудтайгаа нээлттэй хамтран ажиллана. Оффисын түргэн тусламжийн баг бэлэн зогсож байна гэсэн үг. Энэ үйлчилгээ бол амьдралаас урган гарсан. Олон олон компаниуд зочны өмнө хүндрэлтэй байдалд орж хамтын ажиллагаанд нь нөлөөлж байсан түүх байдаг. Иймд бидний зүгээс энэ эрсдэлээс хамгаалах зорилготой баг, үйлчилгээг бий болгож компаниудыг дэмжинэ. Жишээ нь та манай оффисын нэг л өрөөг ашигладаг ч гэсэн шаардлагатай тохиолдолд оффисын бусад зүйлсийг ашиглах боломжоор хангагдана гэсэн үг юм. Дахиад хэлэхэд бусдыг л бодоод байвал барилга маань сайжраад л байна гэсэн үг.

– Сонирхолтой байна. Гэвч ярилцлага дуусаж байна. Цаг гаргаж бидэнд сонирхолтой мэдлэг хуваалцсанд маш их баярлалаа.

Биднийг хүлээн авч ажлын минь талаар ярих боломж болгосон танд баярлалаа. Ирээдүйд ихийг бүтээж хөгжлийг зорьж байгаа шинэ үеийн олон манлайлагч нарыг урьж байна. Бидэнтэй нэгдээрэй. Хамтдаа хөгжмөөр байна. Манай бүтээгдэхүүн үйлчилгээг сонирхоорой. Бас бидэнтэй хамтраарай. Урьж байна. Шинэ шинэ олон зүйлийг хамтдаа бүтээхийг хүсэж байна. Манай баг таныг зорилгодоо хүрэхэд тань хамгийн сайн хамтрагч байж чадна гэдэгтээ итгэлтэй байна. Илүү их зүйлийг сонирхвол бидэнд хандаарай.

ITC | International trade center

Эх сурвалж: https://ikon.mn/n/2ois